अखिल भारतीय मराठी नाट्य परिषद लातूर विषयी

अखिल भारतीय मराठी नाट्य परिषद ही मराठी नाटक व नाट्य क्षेत्रात कार्यरत असलेली देशातील सर्वात मोठी संस्था आहे. इ.सन्   1905 ला स्थापन झालेल्या या संस्थेचे कार्यक्षेत्र केवळ महाराष्ट्र किंवा भारत देशच नव्हे तर जागतिक राहिले आहे. प्रतिवर्षी भव्य नाट्य संमेलन आयोजित करुन वर्षातून एकदा अधिकाधिक नाटकवाल्या मंडळींना एकत्रित केले जाते. नाट्यचळवळ वृद्धिंगत करण्यासाठी सातत्याने प्रयत्न करत असते. त्यासाठी महाराष्ट्र व महाराष्ट्राबाहेरही परिषदेच्या शाखा स्थापन करण्यात आल्या आहेत. शाखांच्या माध्यमातून अनेक उपक्रम राबविले जातात. सर्वच संमेलने ही शाखांच्या माध्यमातूनच मध्यवर्ती आयोजित करत असते.  परिषदेच्या शाखा याच नाट्य चळवळीच्या मुख्य धमण्यांच कार्य करतात. अशाच शाखांपैकी एक शाखा म्हणजे लातूर महानगर शाखा.
लातूर महानगर शाखेची स्थापना 2015 साली तत्कालीन अध्यक्ष श्री मोहन जोशी यांच्या अध्यक्षतेखालील नियामक मंडळाच्या मंजुरीने झाली. आज रोजी शाखेचे 325 सदस्य असून सदस्यत्वासाठी सातत्याने विचारणा होत असते. परंतु परिषदेच्या घटनेप्रमाणे केवळ रंगकर्मी व नाटकाशी  प्रत्यक्ष संबंध असलेल्या व्यक्तींनांच सदस्यत्व देण्यावरच शाखेचा भर आहे. सर्व सर्वसमावेशकपणे शाखा नाट्य वृद्धिसाठी लातूर व परिसरात सक्षमपणे कार्यरत आहे.